Ársskýrsla Origo 2018

Sameining og nýtt vörumerki skila ávinningi

Árið 2018 hófst með formlegri sameiningu Nýherja, Applicon og TM Software undir nýju vörumerki, Origo. Segja má að sameining félaganna hafa verið lengi í undirbúningi, m.a. með því að undanfarin ár höfum við lagt aukna áherslu á samstarf á milli félaga samstæðunnar um lausnaþróun og þjónustu við viðskiptavini.

Markmið með sameiningunni voru m.a. að tengja starfsemi samstæðunnar betur saman og auðvelda fyrirtækinu að bjóða upp á flóknari og umfangsmeiri lausnir sem viðskiptavinir kalla eftir í auknum mæli. Einnig var það markmið að einfalda fyrirtækið, auka hagkvæmni m.a. með því að draga úr tvíverknaði og gera viðskiptavinum kleift að nálgast alla upplýsingatækniþjónustu á einum stað. Að lokum vildum við skerpa á markaðssetningu okkar og gera hana skýrari og skilvirkari. Þó svo að með breytingum af þessu tagi sé tjaldað til lengri tíma en árs, þá sjáum við strax jákvæða þróun sem er afrakstur sameiningar og nýs vörumerkis.

Kynning á nýju nafni og endurmörkun Origo hefur gengið vonum framar. Eðli málsins samkvæmt er þessi vinna rétt að byrja, en undir nýju nafni hefur Origo nú þegar náð sterkri stöðu sem leiðandi þjónustufyrirtæki í upplýsingatækni og er nú í fyrsta sinn efst í huga fólks þegar kemur að fyrirtækjum í upplýsingatækni (skv. mælingum Gallup). Náum við nú til breiðari aldurshóps en áður, ekki síst til yngri markhópa, sem endurspeglar vel þá flóru viðskiptavina sem skipta við Origo nú og á næstu árum.

Rekstrarbati og áfangi í sölu á Tempo

Við höfum jafnt og þétt náð fram auknu hagræði í rekstri og finnum hvernig viðskiptavinir taka vel á móti því breiða lausnaframboði sem nú er kynnt af einu fyrirtæki, ekki þremur. Eftir slaka byrjun á fyrsta ársfjórðungi hefur verið stígandi í rekstri og voru síðustu tveir fjórðungar ársins þeir bestu í sögu félagsins þegar horft er til rekstrarniðurstöðu. Afkoma af rekstri fyrir árið í heild var vel viðunandi, 1,1 milljarður króna og hefur ekki áður verið betri sem hlutfall af veltu.

Í nóvember lauk svo söluferli á hlut í Tempo þegar Diversis Capital keypti 55% hlut í félaginu og tók að sér það verkefni að leiða félagið til frekari vaxtar og verðmætasköpunar. Viðskiptin eru sérstaklega ánægjuleg viðurkenning á frábæru starfi starfsfólks Tempo og Origo síðustu ár. Um leið staðfesta þau áþreifanlega möguleika til verðmætasköpunar á grunni íslensks hugvits, en salan á Tempo telst þriðju verðmætustu viðskiptin í sögu íslensk viðskiptalífs þegar kemur að hugbúnaðartengdri starfsemi. Það er mat okkar að eitt mikilvægasta hagsmunamál hluthafa Origo sé að félagið haldi áfram verulegum eignarhlut í Tempo, enda eru vaxtarmöguleikar miklir og með hliðsjón af því þá er verðmæti félagsins líklega síst ofmetið.

Áhrif af sölu á Tempo á afkomu Origo námu um 5 milljörðum króna. Heildarhagnaður Origo á síðasta ári nam því um 5,4 milljörðum króna, sá hæsti í sögu félagsins. Eftir góðan rekstur á árinu og sölu á hlut í Tempo er Origo í mjög sterkri fjárhagslegri stöðu, með ríflega 8 milljarða eigið fé, 66% eiginfjárhlutfall og handbært fé upp á 3,2 milljarða.

Vægi upplýsingtækni aldrei meira

Verkefni stjórnenda í atvinnurekstri er stöðugar endurbætur, en í því felst að ávallt þarf að hagræða í viðskiptaferlum, einfalda, auka hraða og sjálfvirkni. Þetta verður ekki gert svo neinu nemi án stuðnings upplýsingatækni, sem er þannig mikilvægasti áhrifaþáttur á samkeppnisforskot fyrirtækja og stofnana. Við sjáum þetta glögglega í stefnulýsingum þar sem fyrirtæki í öllum atvinnugreinum vísa til upplýsingatækni eða stafrænna áherslna sem grunnþáttar í sinni starfsemi. Með öðrum orðum, þá byggja öll fyrirtæki tilveru sína með einum eða öðrum hætti á upplýsingatækni, sem setur fyrirtæki eins og Origo í lykilstöðu.

Rekstrarlegum ávinningi af upplýsingatækni er að hluta til hægt að ná með öflugum búnaði og áreiðanlegum rekstri tækniinnviða. Þar býr Origo að sögulegum styrk, enda höfum við útvegað íslensku atvinnulífi gæða tölvubúnað og rekstrarþjónustu um langt árabil. Með sameiningu Nýherja við dótturfélögin TM Software og Applicon höfum við svo sérstaklega styrkt framboð okkar á hugbúnaðarlausnum og viðskiptakerfum fyrir stjórnendur, stuðning við hugbúnaðarþróun, ráðgjöf og þjónustu. Þetta hefur verið gert með það að markmiði að styðja viðskiptavini okkar í að breyta og einfalda hjá sér viðskiptaferla sem og nýta sjálfvirkni í auknum mæli. Lausnaframboð okkar nú endurspeglar þá viðamiklu flóru verkfæra sem atvinnurekstur kallar eftir í dag og sameinuð undir einu nafni teljum við að Origo eigi erindi til íslensks atvinnulífs sem aldrei fyrr, bæði núverandi og framtíðar viðskiptavina.

Fjárfesting í þróun og framtíðartekjum

Á undanförnum árum höfum við nýtt sífellt sterkari stöðu Origo til fjárfestinga í þróun eigin lausna, samstarfi og kaupum á rekstrareiningum sem falla að þjónustuframboði okkar og þörfum viðskiptavina. Þar má nefna Kjarna, sem er launa- og mannauðskerfi, gæðastýringarlausnina CCQ, bílaleigukerfið Caren, Timian sem er rafrænt innkaupakerfi, auk kerfa fyrir heilbrigðisþjónustu, Sögu, Heklu, Medicor og Heilsuveru. Að auki höfum við þróað viðbætur við SAP og Dynamics NAV og styrkt þannig stöðu okkar á markaði viðskiptalausna og lausna fyrir fjármálafyrirtæki. Að sama skapi höfum við í auknum mæli leitast við að bjóða viðskiptavinum aðgang að þjónustum í áskrift, gjarnan sem skýjalausnir, enda er nýting viðskiptavina á upplýsingatækni ört að færast úr einskiptis fjárfestingum á nokkurra ára fresti yfir í að verða hluti af rekstri. Við sjáum svo afrakstur þessarar vinnu í breyttri samsetningu tekna okkar, þar sem tekjur vegna eigin hugbúnaðarlausna Origo, áskriftar og ráðgjafar hafa aukist umtalsvert á milli ára. Við væntum þess að framhald verði á þeirri þróun á næstu árum.

Origo mun áfram leita tækifæra til að auka við og efla lausna- og þjónustuframboð. Þar höfum við sérstaklega litið til þeirra möguleika sem felast í einföldun og sjálfvirknivæðingu viðskiptaferla, greiningar á gögnum til ákvörðunartöku og stýringar upplýsingaöryggis sem er að verða æ mikilvægari þáttur í upplýsingatæknivæddu atvinnulífi hérlendis og erlendis. Sameinað Origo hefur aukið möguleika okkar á að sjá viðskiptavinum okkar fyrir heildstæðu lausnamengi þar sem horft er til samþættingar fjölbreyttra viðskipta- og hugbúnaðarlausna, rekstrarþjónustu og tæknibúnaðar.

Lausnaþróun skapar virði til lengri tíma

Við ákvarðanir um fjárfestingar í lausnaþróun horfum við annars vegar til möguleika okkar á innlendum markaði og hins vegar tækifæra til að koma lausnum á framfæri við stærri hóp viðskiptavina erlendis. Þegar lausnaþróun er fyrst og fremst miðuð að íslenskum markaði þá setur það fjárfestingu eðlilega skorður vegna smærra mengis mögulegra viðskiptavina. Ef lausnir eru hins vegar þess eðlis að þær geti átt við víðar en hérlendis, fyrir stærri hóp viðskiptavina á erlendum mörkuðum, þá réttlætir það aukna fjárfestingu. Þetta á einkum við þegar um hugbúnaðarlausnir er að ræða, því þegar lausnin skapar viðskiptavinum skýran ávinning og leið á markað er greið, þá eru vaxtarmöguleikar nánast ótakmarkaðir.

Velgengni Tempo er skýrasta dæmið okkar um árangursríkt þróunarstarf af þessu tagi, en þar sprettur þörfin fyrir verkfæri til tímaskráningar- og áætlunargerðar upp úr daglegri vinnu starfsmanna Origo (þá TM Software) fyrir íslenska viðskiptavini, sérstaklega Icelandair. Þar sem þörfin fyrir öflug verkfæri af þessu tagi var ekki bundin við Ísland og auðvelt var að koma hugbúnaðinum til stærri hóps viðskiptavina utan landsteinanna reyndist mögulegt að byggja upp það glæsilega og verðmæta fyrirtæki sem Tempo er í dag.

Sala á ríflega helmingshlut í Tempo staðfestir mikilvægi þróunar eigin lausna fyrir fyrirtæki eins og Origo og einnig hvernig þróun skapar langtíma virði fyrir hluthafa. Jafnframt gefur hún fyrirheit um hvernig nýta má reglulega starfsemi þjónustufyrirtækja sem vettvang til að þróa og prófa lausnir sem síðar er hægt að flytja út á stærri markað og byggja þannig upp verðmætari atvinnustarfsemi en mögulegt er ef eingöngu er horft til Íslands.

Við erum því bjartsýn á það sem er framundan. Framtíðin liggur í upplýsingatækni og þar er Origo í lykilstöðu.

Framtíðin er Origo.

Besta afkoma í sögu félagsins

Afkoma Origo á árinu 2018 er sú besta í sögu félagsins og forvera þess. Heildarhagnaður félagsins jókst mikið og var 5.420 m.kr. samanborið við 433 m.kr. á árinu 2017. EBITDA nam 1.128 m.kr. (7,2%) á árinu 2018, en var 928 m.kr. (6,2%) árið 2017. EBITDA félagsins jókst eftir því sem leið á árið og nam 423 m.kr. (9,5%) á fjórða ársfjórðungi og hefur aldrei verið meiri í sögu félagsins.

Samruni þriggja félaga

Árið 2018 markar ákveðin þáttaskil í sögu Origo og forvera félagsins. Origo varð til í upphafi ársins með samruna þriggja félaga og hefur sameiningin og endurmörkun vörumerkisins nú þegar skilað sér í auknum ávinningi fyrir viðskiptavini og einnig stuðlað að hagkvæmni og betri afkomu Origo. Starfsemi Origo hefur þróast töluvert á þessu eina ári.

Origo selur helminghlut í Tempo

Sala Origo á ríflega helmingshlut í Tempo seint í nóvember 2018 var mikilvægt skref fyrir bæði Origo og starfsemi Tempo. Eftir söluna er fjárhagur Origo mjög sterkur og félagið á þeim stað að geta stutt bæði við innri og ytri vöxt en jafnframt staðið af sér erfiðar ytri aðstæður ef svo ber undir. Í sölunni á Tempo felst viðurkenning á frábæru starfi starfsfólks Tempo og Origo síðustu ár. Um leið eru verðmæti íslensks hugvits staðfest áþreifanlega, en síðustu misseri hefur slíkt þróunarstarf fengið aukna athygli og stuðning stjórnvalda, sem er vel.

Með stuðningi Diversis og Origo gerum við ráð fyrir að nú fari í hönd nýr kafli þróunar og tekjuvaxtar hjá Tempo og að virði félagsins geti aukist verulega á næstu misserum. Við höfum því lagt sérstaka áherslu á að Origo haldi áfram verulegum eignarhlut í félaginu og teljum það reyndar eitt af mikilvægari hagsmunamálum hluthafa Origo.

Heildartekjur Hugbúnaðarlausna námu 2.129 m.kr. og jukust þær um 7,7% á milli ára. Heildarafkoman er góð. Á fjórða ársfjórðung var áfram góð eftirspurn eftir þjónustu hugbúnaðarsérfræðinga og ráðgjafa. Góð eftirspurn var eftir öryggislausnum og tengdri ráðgjöf auk þess sem sala á eigin lausnum félagsins og hugbúnaði frá samstarfsaðilum var ágæt.

Góður vöxtur var í áskriftartekjum af eigin hugbúnaði Origo. Eftirspurn eftir Kjarna, mannauðs- og launalausn var einnig góð. Sjö nýir viðskiptavinir bættust í Kjarna-hópinn á fjórðungnum, sem styrkir enn stöðu Origo sem leiðandi í lausnaframboði á sviði mannauðs- og launakerfa.

Unnið er að innleiðingu netbanka og annarra lausna fyrir nokkur fjármálafyrirtæki, sem hefur verið vaxtarbroddur í starfsemi Viðskiptalausna. Áfram var unnið að nýsköpun og vöruþróun á árinu í fjölbreyttu lausnamengi Origo, en afkoma Viðskiptalausna litast af gjaldfærðum kostnaði við fjárfestingu í lausnum, svipað og var árið 2017.

Til að auka enn frekar breidd í framboði Viðskiptalausna keypti Origo á fjórða ársfjórðungi 60% hlut í Sendill Unimaze ehf., sem sérhæfir sig rafrænum viðskiptum, svo sem miðlun rafrænna reikninga.

Töluverð vinna var sett í þróun nýrra viðskiptalausna á sviðinu og jafnframt er unnið að áhugaverðum sölutækifærum og því útlit fyrir áframhaldandi sterkan vöxt og bætta afkomu.

Verkefnastaðan er góð og rekstrahorfur ágætar.

Gagnaský Origo tekið í gagnið

Heildartekjur Rekstrarþjónustu og innviða námu 4.431 m.kr. og drógust saman um 3% á milli ára. Þar vegur þyngst minni sala á miðlægum búnaði, en á móti jukust þjónustutekjur.

Minni vörusala á árinu vó þyngst á fyrri helmingi ársins, en góður stígandi var í henni þegar líða tók á árið og jókst sala á miðlægum búnaði á seinni helming ársins samanborið við sama tíma árið 2017.

Fjöldi tíma sérfræðinga í útseld verkefni jókst um 40% á milli ára og verkefnastaða í upphafi árs er áfram mjög góð.

Nýrri þjónustu var ýtt úr vör undir lok árs þegar Gagnaský Origo var opnað og eru fyrstu viðskiptavinir farnir að nýta sér þjónustuna, sem telst nýjung á markaði og sérlega hagkvæm. Fyrirhugað er að geymslurýmd Gagnaskýs Origo vaxi hratt á næstu misserum, eftir þörfum viðskiptavina.

Verkefnastaðan er góð og rekstrahorfur ágætar.

Stafrænar áherslur og netverslun í sölu á tölvubúnaði

Heildartekjur Notendalausna námu 4.630 m.kr., sem er um 5,4% vöxtur milli ára. Tekjuaukningin stafar meðal annars af stafrænum áherslum og sjálfvirknivæðingu í verslunarhlutanum. Aukin áhersla hefur verið lögð á netverslun Origo, sem hefur margfaldað tekjur sínar á einu ári, en þar geta viðskiptavinir afgreitt sig sjálfir hratt og örugglega. Tekjuaukningu má einnig rekja til vaxandi eftirspurnar eftir lausnum frá Sony, Bose og Lenovo.

Mikil umsvif voru einnig í hljóð- og myndlausnum, einkum fyrir ferðaþjónustufyrirtæki.

Góð eftirspurn eftir bankalausnum í Svíþjóð

Góð eftirspurn var eftir þjónustu ráðgjafa Applicon á fjórða ársfjórðungi og yfir árið og hefur ráðgjöfum verið fjölgað til að anna betur auknum umsvifum. Stærstu verkefni Applicon tengjast innleiðingu og viðhaldi á kjarnabankalausnum fyrir SBAB bankann og Landshypotek Bank og er fyrirtækið það eina á þessu sviði í Svíþjóð sem getur státað af tveimur af 10 stærstu bönkum landsins í viðskiptavinahópi sínum. Samstarfið við fyrrnefnd fyrirtæki hefur reynst farsælt en þau völdu Applicon til þess að vinna að mikilvægum viðbótarverkefnum sem tengjast kjarnastarfsemi þeirra.

Stöðugildi og kynjahlutfall

Nokkur fjölgun var á starfsfólki á árinu hjá Origo. Í upphafi árs var fjöldi stöðugilda Origo 429 en í lok árs voru stöðugildin 443. Stöðugildum fjölgaði því um 14 á árinu. Fjöldi starfsfólks hjá Applicon í Svíþjóð voru 52 í lok árs. Samtals fjöldi stöðugilda hjá Origo og Applicon í Svíþjóð eru því 495.

Kynjahlutfall hjá Origo skiptist þannig að 24% starfsmanna eru konur og 76% karlar og er þetta svipað hlutfall og á undangengnu ári. Það hefur loðað við upplýsingatæknigeirann að karlar hafa verið í meirihluta, en samstæðan hefur einsett sér með skýrri stefnu og framkvæmdaáætlun jafnréttismála að vinna áfram að því langtímamarkmiði að því að fjölga konum innan félagsins.

Jafnlaunavottun

Origo hlaut í lok síðasta árs vottun á jafnlaunakerfi fyrirtækisins. Innleiðing jafnlaunakerfisins var unnin í samræmi við jafnlaunastaðalinn ÍST 85:2012, en kerfinu er ætlað tryggja að allar ákvarðanir varðandi laun séu teknar á sama hátt fyrir konur og karla og að þau viðmið sem lögð eru til grundvallar launaákvörðunum feli ekki í sér kynjamismunun. Innleiðing jafnlaunakerfis er hluti af jafnréttisáætlun Origo.

Jafnlaunakerfið var vottað af BSI á Íslandi og hefur fyrirtækið fengið afhent skírteini því til staðfestingar. Þá hefur Origo einnig fengið heimild Jafnréttisstofu til að nota jafnlaunamerki Velferðaráðuneytisins.

Jafnlaunakerfi Origo var unnið af mannauðsteyminu ásamt aðkomu ráðgjafa og nokkurra annarra sérfræðinga innan Origo á árinu 2018 og fór úttekt á því fram í desember síðastliðnum.

Kynning á upplýsingatæknistörfum fyrir ungt fólk

Origo hefur lagt sig fram um að kynna störf í upplýsingatækni fyrir ungu fólki á ýmsum skólastigum, til að vekja áhuga á þeim fjölbreyttu og skapandi störfum sem þar er að finna. Fyrir háskólanemendur höfum við haldið fyrirtækjakynningar og vísindaferðir og tekið þátt í framadögum háskólanna. Á vettvangi grunnskóla höfum við tekið þátt í GERT samstarfsverkefninu, haldið kynningar fyrir skólahópa og tekið þátt í verkefninu Stelpur og tækni. Við höfum einnig tekið þátt í starfamessum á vegum framhaldsskóla og farið í heimsóknir.

Hreyfing, heilsa og vistvænar samgöngur

Starfsmenn Origo samstæðunnar eru duglegir þegar kemur að hreyfingu, vistvænum samgöngum og keppnum sem tengjast hreyfingu eins og undanfarin ár. Árið 2018 byrjaði með heilsuátaki þar sem starfsmenn tóku þátt í heilsutengdum keppnum og sóttu fyrirlestra um málefni tengda andlegri og líkamlegri heilsu

Fjöldi starfsmanna tók sem fyrr þátt í Hjólað í vinnuna og Origo átti 10 manna lið í WOW Cyclothon keppninni líkt og fyrr og náði liðið glæsilegum árangri.

Origo styrkir starfsmenn sína líka til þátttöku í Reykjavíkurmaraþoninu og tóku um 60 starfsmenn þátt í hlaupinu í ár og hlupu til styrktar góðu málefni. Origo lagði til 500 kr á hvern km sem fólk hljóp og gátu starfsmenn því lagt af mörkum til mismunandi góðgerðarmála.

Einnig tók fjöldi starfsmanna þátt í skemmtilegasta hlaupi ársins, Gung-Ho!, en Origo var meðal styrktaraðila í því skemmtilega þrautarhlaupi.

Starfsmenn Origo og dótturfélaga eru einnig duglegir að stunda vistvænar samgöngur. Á árinu 2018 voru um 118 starfsmenn með virka samgöngusamninga eða um fjórðungur starfsmanna.

Samfélagsábyrgð

Stefna Origo um samfélagsábyrgð leggur áherslu á tengsl við ungt fólk, menntun og nýsköpun, sem hafa verið grunnþættir í þeim verkefnum sem félagið hefur styrkt um nokkurt skeið. Samfélagsstefna Origo byggir áfram á þessum áherslum en er einnig nánar útfærð til að taka til fjögurra meginstoða, sem eru: Mannauður, umhverfi, góðir stjórnarhættir og styrkir við góð málefni. Fjallað hefur verið um mannauð og jafnrétti hér ofar.

Samfélagsleg mál og styrkir

Samfélagsleg ábyrgð skiptir Origo miklu máli og hefur félagið unnið að því að auka samfélagslega ábyrgð sína með margvíslegum hætti. Samfélagsstefna félagsins hefur verið römmuð inn í tengslum við ungt fólk, menntun og nýsköpun, sem hafa verið grunnþættir í þeim verkefnum sem félagið hefur styrkt um nokkurt skeið. Samfélagsstefna félagsins byggir m.a. á þessum áherslum.

Meðal verkefna sem styrkt hafa verið eru: Unglingastarf SÁÁ, Háskóli unga fólksins, Forritunarkeppni framhaldsskólanna á vegum HR, Hönnunarkeppni véla- og iðnaðarverkfræðinema í Háskóla Íslands, Forritarar framtíðarinnar, First Lego hönnunarkeppnin, Verkefni Samtaka iðnaðarins um kynningu náms í tæknigreinum háskóla fyrir framhaldsskólanemum.

Spilling, mútur og mannréttindi

Starfsfólk Origo hefur sett sér siðareglur sem varða almenna viðskiptahætti og viðskiptasiðferði. Reglurnar vísa til væntinga um vinnulag gagnvart viðskiptavinum, samstarfsfólki, eigendum, samkeppnisaðilum og samfélagi. Í reglunum kemur fram að heiðarleiki og ótvíræð samskipti séu lykilatriði góðs viðskiptasiðferðis. Allir viðskiptaaðilar Origo eiga rétt á réttlátri og sanngjarnri meðferð í anda jafnræðisreglu. Starfsmönnum ber að gera viðvart um atvik, þar sem ætla má, að lög séu brotin. Slíkt ber að gera við yfirmann eða til yfirstjórnar fyrirtækisins beint. Starfsmenn munu á engan hátt gjalda þess í starfi séu þeir að uppfylla skyldu sína í þessu efni og er trúnaðar gætt, sé þess óskað. Starfsmaður skal ekki þiggja gjöf, þjónustu, skemmtun eða persónulegan greiða sem með réttu mætti álykta að gæti haft áhrif á viðskipti. Boð um skemmtun ætti ekki að þiggja nema boðið sé innan marka viðurkenndrar viðskiptagestrisni. Fái starfsmenn tilboð eða jafnvel hótanir í tengslum við störf sín ber viðkomandi að tilkynna það yfirmanni sínum strax.

Félagið virðir almenn mannréttindi, rétt allra til félagafrelsis og kjarasamninga. Því til stuðnings hefur félagið sett sér jafnréttisstefnu og siðareglur eins og fjallað var um hér fyrir framan. Áhersla er lögð á að verktakar og undirverktakar fari eftir gildandi lögum í landinu er varðar alla starfsmenn sína, sama hvort það eru launþegar þeirra eða eigin undirverktakar.

Góðir stjórnarhættir

Stjórn Origo hf. leitast við að viðhalda stjórnarháttum og fylgja „Leiðbeiningum um stjórnarhætti fyrirtækja“ sem Viðskiptaráð Íslands, Nasdaq OMX Iceland og Samtök atvinnulífsins gáfu út. Stjórnin hefur sett sér ítarlegar starfsreglur þar sem valdsvið hennar er skilgreint og verksvið gagnvart forstjóra. Origo er fyrirmyndarfyrirtæki í góðum stjórnarháttum samkvæmt mati Rannsóknarmiðstöðvar um stjórnarhætti við Háskóla Íslands, að undangenginni ítarlegri úttekt Capacent á haustmánuðum 2014.